მონაწილეობითი სამოქალაქო მონიტორინგის დროს მოქალაქეთა ჯგუფები აფასებენ, თუ რამდენად ეფექტურია (მიზნობრივი, დროული, შედეგიანი) ხელისუფლების მიერ გაწეული საჯარო მომსახურება და რამდენად აკმაყოფილებს იგი მოქალაქეთა რეალურ საჭიროებებს. ტრენინგის პროგრამა მიზნად ისახავს სამოქალაქო მონიტორინგის სხვადასხვა ინსტრუმენტების გაცნობას (მონაწილეობითი ბიუჯეტირება, მოქალაქეთა ანგარიშგების ბარათები და სამოქალაქო მრჩეველთა საბჭო) და მათი გამოყენების სწავლებას. ტრენინგის უმთავრესი მიზანია ხელი შეუწყოს ადგილობრივი თვითმმართველობის ორგანოებს ახალი ტიპის მიდგომების დანერგვაში მოსახლეობასთან ურთიერთობის თვალსაზრისით; გარდა ამისა, მოახდინოს სამოქალაქო საზოგადოების გააქტიურება და გაზარდოს მისი ჩართულობის ხარისხი ადგილობრივი თვითმმართველობის ორგანოების საქმიანობის პროცესში, რაც გულისხმობს ბიუჯეტის დაგეგმვაში, პრიორიტეტების განსაზღვრაში მონაწილეობას, ხოლო შემდგომში ბიუჯეტის ხარჯვაზე, პროექტების განხორციელებაზე მონიტორინგს და პროცესებში თანამონაწილეობას. ტრენინგი წარმოადგენს ადგილობრივი ლიდერების გააქტიურების მცდელობას, კერძოდ, მათი ჩართულობის გაზრდას ადგილობრივი თვითმმართველობის ორგანოების მუშაობის პროცესში და, მათ აღჭურვას ახალი უნარებით და ინსტრუმენტებით. შედეგად, მონაწილეები უკეთ მოახერხებენ ადგილობრივ მუნიციპალიტეტებთან თანამშრომლობას, და მოსახლეობის ინტერესების კომუნიკაციას გადაწყვეტილების მიღების დროს.