|
ENG | GEO
|
24 აპრილი, 2024 |
|
|
|
ძირითადი ტრენინგები
პარტნიორები-საქართველოს ტრენინგ-პროგრამები მუშავდება კონკრეტული ჯგუფის ან კომპანიის მოთხოვნების შესაბამისად. სწავლება ინტერაქციულად მიმდინარეობს. პარტნიორები-საქართველოს ძირითადი ტრენინგები მოიცავს ისეთ თემებს, როგორიცაა:
|
ეფექტური კომუნიკაცია
ეფექტური კომუნიკაცია პირად და საქმიან ურთიერთობებში წარმატების მიღწევის საფუძველია. ეს არის უნარი, რომელიც სწავლებადი და გავარჯიშებადია და, რაც მთავარია, მოკლე დროში. ეფექტური კომუნიკაციის ტრენინგზე განიხილება ისეთი საკვანძო საკითხები, როგორიცაა პარტნიორზე ორიენტირებული კომუნიკაციის არსი და უპირატესობები, ინფორმაციის ეფექტურად გადაცემის ხელის შემწყობი და ხელის შემშლელი ფაქტორები, სხვადასხვა ადამიანების მიერ ერთი და იგივე მოვლენის განსხვავებულად აღქმის მიზეზები და გავლენა კომუნიკაციის პროსეცზე, ტრანსაქციური ანალიზის საშუალებით სხვადსახვა სიტუაციის შესაბამისი ეფექტური ქცევის განხორიცელება, სხეულის ენის მნიშვნელობა და როლი კომუნიკაციისას. ტრენინგის მონაწილეები შეისწავლიან და გაივარჯიშებენ მოსმენის, შეკითხვის დასმის, დარწმუნებისა და არგუმენტირების ტექნიკას, და ტრენინგის შემდეგ შეძლებენ პირადი და საქმიანი ეფექტური კომუნიკაციის დამყარებას – სასურველი მიზნის მიღწევას და ამავდროულად, პარტნიორთან პოზიტიური ურთიერთობების შენარჩუნებას.
|
|
კონფლიქტების მართვა
ადამიანების უმეტესობა გაურბის კონფლიქტურ სიტუაციას და უარყოფით დამოკიდებულებას გამოხატავს მის მიმართ. თუმცა, ვინაიდან კონფლიქტი ჩვენი ყოველდღიური ცხოვრების შემადგენელი ნაწილია, შეუძლებელია მთლიანად ავირიდოთ იგი თავიდან. თუკი სწორად ვმართავთ მას, კონფლიქტური სიტუაცია შესაძლოა განვითარებისა და პოზიტიური ცვლილებების სტიმულიც კი გახდეს როგორც საქმიან, ასევე პირად ცხოვრებაში. პრობლემა იმაშია, რომ არ ვიცით როგორ ვმართოთ კონფლიქტური სიტუაცია, რა უწყობს ხელს მის გამძაფრებას და რა უზრუნველყოფს კონფლიქტური სიტუაციის დამშვიდებას, რა ტიპის ქცევების განხორციელებაა ეფექტური ამა თუ იმ სიტუაციაში და არსებობს თუ არა ერთი, უნივერსალური ეფექტური სტრატეგია კონფლიქტის მოგვარებისა და მართვისათვის. ტრენინგზე დეტალურად განიხილება ეს და სხვა საკვანძო საკითხები. მონაწილეები შეისწავლიან იმ კომუნიკაციურ ტექნიკებსაც, რომელთა გამოყენებითაც ეფექტურად შეიძლება კონფლიქტური სიტუაციის მართვა როგორც საწყის, ასევე შედარებით გამძაფრებულ სტადიაზე. ტრენინგის გავლის შემდეგ მონაწილეები უკეთ შეძლებენ საკუთარი ემოციების მართვას, საკუთარი ინტერესების დაცვას დაპირისპირებული მხარის ინტერესების შელახვის გარეშე, და ურთიერთმისაღები გადაწყვეტილების შემუშავებას.
|
|
მოლაპარაკების წარმართვა
ტრენინგის მიზანია გააცნოს მონაწილეებს მოლაპარაკების, როგორც კომუნიკაციის ერთ-ერთი ფორმის სხვადასხვა სახეები და თითოეულისათვის დამახასითებელი თავისებურებები; დაეხმაროს მათ მოლაპარაკების მიზნების სწორად განსაზღვრასა და ჩამოყალიბებაში, პროცესის მართებულად დაგეგმვასა და ეფექტურად წარმართვაში. ტრენინგზე მონაწილეები გაეცნობიან მოლაპარაკების პროცესის განსხვავებული სტრატეგიების არსს და მნიშვნელობას. ტრენინგის გავლის შემდეგ მონაწილეები შეძლებენ სხვადასხვა სტრატეგიის სიტუაციურად გამოყენებას იმისდა მიხედვით, თუ რომელი სტილი იმუშავებს უკეთ ამა თუ იმ პარტნიორთან, რა კონკრეტული საკითხის თაობაზე მიმდინარეობს მოლაპარაკება და ერთჯერადი მოლაპარაკებაა ეს, თუ ხანგრძლივი ურთიერთობის პროცესი. მოლაპარაკებისას მონაწილეები შეძლებენ პარტნიორის არაპატიოსანი (მანიპულაციური) ზრახვებისა და ქმედებების (თუკი ასეთს ადგილი ექნება) დროულად დაინახვას და მათ განეიტრალებას შესაბამისი ტექნიკის გამოყენებით.
|
|
მედიაცია
მედიაცია წარმოადგენს პრობლემების მოგვარების ალტერნატიულ პროცესს, რომლის დროსაც კონფლიქტში ჩართული მხარეები მედიატორის (მესამე ნეტრალური მხარის) დახმარებით ცდილობენ ურთიერთმისაღები გადაწყვეტილების პოვნას. ტრენინგზე მონაწილეები გაერკვევიან, თუ რას ნიშნავს მესამე ნეიტრალური მხარის მონაწილეობა კონფლიქტის მოგვარების პროცესში; შეისწავლიან მედიაციის პროცესის სპეციფიკას; მიმდინარეობის ეტაპებს და მის უპირატესობებს კონფლიქტის მოგვარების ტრადიციულ პროცესებთან შედარებით. ტრენინგის მონაწილეებს მიეცემათ საშუალება განივითარონ მედიატორის საქმიანობისათვის აუცილებელი უნარ-ჩვევები. ტრენინგის შემდგომ, ისინი შეძლებენ კონფლიქტის ეფექტურად მოგვარებისათვის საჭირო ქმედებების განხორციელებას საკუთარ თემში, ორგანიზაციაში, სკოლაში, ოჯახში, ორგანიზაციაში, თუ სხვა; აგრეთვე, შეძლებენ მედიატორის როლის შესრულებას მხარეთა დაპირისპირების დროს.
|
|
ლიდერობა და გუნდური მუშაობა
გუნდურ მუშაობას და გუნდის მუშაობის მართვას თავისი წესები და ქცევის რეკომენდირებული და არარეკომენდირებული ფორმები გააჩნია. ტრენინგზე დეტალურად განიხილება გუნდური მუშაობის სპეციფიკა, მისი განსხვავება ჩვეულებრივი ჯგუფური მუშაობისგან და ის “თამაშის წესები”, რომლითაც გუნდი ხელმძღვანელობს. მონაწილეები გაეცნობიან გუნდის წევრთა სხვადასხვა როლებს გუნდური მუშაობისას და თითოეული მათგანის მნიშვნელობას მიზნის მიღწევისათვის. მონაწილეები შეისწავლიან მართვისა და ლიდერობის სხვადასხვა მოდელს, მათ შორის სიტუაციური მართვის მოდელს; სხვა ადამიანის (ჯგუფის) ქცევაზე გავლენის მოხდენის რეკომენდირებულ ტექნიკებს. გააცნობიერებენ განსხვავებას გუნდური მუშაობის შინაარსსა და პროცესს შორის და გაეცნობიან გუნდური მუშაობის პროცესის მართვის სხვადასხვა ტექნიკას.
|
|
მრავალფეროვნების მართვა
მრავალფეროვნების მართვის ტრენინგი მიზნად ისახავს გააცნობიერებინოს მონაწილეებს ის განსხვავებები, რაც ახასიათებს ნებისმიერ საზოგადოებას და განუვითაროს მათ მგრძნობელობა და ტოლერანტობა ამ განსხვავებების მიმართ. მონაწილეები გაეცნობიან მრავალფეროვნების სხვადასხვა ასპექტებს და კონტექსტს, განიხილავენ ინდივიდუალურ და ჯგუფურ იდენტურობასთან დაკავშირებულ პრობლემებს და ისაუბრებენ მრავალეთნიკური საზოგადოების ორგანიზების მოდელების შესახებ. ისინი შეისწავლიან, თუ როგორ ვითარდება სტერეოტიპები, და როგორაა შესაძლებელია უარყოფითი დამოკიდებულებების ჩანაცვლება დადებითით. მონაწილეები გააცნობიერებენ, მრავალფეროვნების საკითხთან დაკავშირებულ რა პრობლემებს აწყდებიან ყოველდღიურად და როგორ გავლენას ახდენენ ეს პრობლემები მათ ცხოვრებასა და საქმიანობაზე. ტრენინგის შედეგად მონაწილეები დაინახავენ მრავალფეროვნებას როგორც ფასეულ რესურსს, რომელსაც შეუძლია მნიშვნელოვნად გააუმჯობესოს გარემო როგორც ერთი კონკრეტული ორგანიზაციის, ასევე მთლიანად საზოგადოების მასშტაბით.
|
|
პრობლემების მოგვარება და გადაწყვეტილების მიღება
ტრენინგი მიზნად ისახავს პრობლემაზე ერთობლივი მუშაობის პროცესის სპეციფიკის სწავლებას. ტრენინგზე მონაწილეები გაეცნობიან პრობლემაზე ჯგუფური მუშაობის ეტაპებს, ეფექტური ჯგუფური გადაწყვეტილების მიღების; დეტალურად გაეცნობიან კონსენსუსის მიღწევის მეთოდებს; გაეცნობიან ალტერნატივების შემუშავების ტექნიკას და შეიძენენ ჯგუფის მუშაობის პროცესის მართვისთვის საჭირო უნარ-ჩვევებს. ტრენინგის შემდეგ მონაწილეები შეძლებენ პრობლემურ სიტუაციაში კონსტრუქციულად ქმედებას და ჯგუფში პრობლემის ეფექტურად მოგვარებას.
|
|
საჯარო გამოსვლა და პრეზენტაცია
ტრენინგის მიზანია ეფექტური პრეზენტაციისათვის საჭირო უნარ-ჩვევების განვითარება და საჯარო გამოსვლის დროს (მათ შორის, სატელევიზიო/რადიო გამოსვლისას) აუდიტორიის მართვის ძირითადი პრინციპების შესწავლა. ტრენინგის გავლის შედეგად მონაწილეები შეძლებენ პრეზენტაციის ეფექტურად მომზადებას, განხორციელებას და პრეზენტაციის შედეგების დამუშავებას. ტრენინგზე დიდი ყურადღება ეთმობა ისეთი საკითხების გავლას როგორიცაა პრეზენტაციის მიზნის ნათლად განსაზღვრა და ჩამოყალიბება; კონკრეტული აუდიტორიის გათვალისწინება გამოსვლის მომზადებისა და განხორციელებისას; საჯარო გამოსვლის დროს აუდიტორიის ყურადღების მიპყრობა და სხვადასხვა რიტორიკული ხერხების გამოყენება; თვალსაჩინოებისა და საპრეზენტაციო მასალის მომზადება და გამოყენება, აუდიტორიის შეკითხვებზე ეფექტურად რეაგირება და სხვა. ტრენინგის გავლის შედეგად მონაწილეები წარმატებით შეძლებენ საჯარო გამოსვლის ისეთი მიზნების მიაღწევას, როგორიცაა აუდიტორიის დარწმუნება, მოტივირება, აზროვნების პროცესის წახალისება, გარკვეული ქმედებებისაკენ წაბიძგება, მასში სასურველი გრძნობებისა და დამოკიდებულებების გამოწვევა და სხვა.
|
|
შეხვედრების ფასილიტაცია
ტრენინგის მიზანია ჯგუფის მუშაობის პროცესის მართვის – ფასილიტაციის სწავლება. მონაწილეები შეისწავლიან ჯგუფის მუშაობის პროცესის ეტაპებს და თითოეულ ეტაპზე ჯგუფის მუშაობის პროცესის გაძღოლას, გაეცნობიან ჯგუფის მუშაობის სხვადასხვა დონეებს და მათ პოზიტიურსა და ნეგატიურ ზეგავლენას ერთმანეთზე; საბოლოო ჯამში, გააცნობიერებენ ჯგუფის მუშაობის მართული პროცესის უპირატესობას. ტრენინგზე მონაწილეებს საშუალება მიეცემათ განივითარონ ფასილიტატორის (ჯგუფის მუშაობის წამყვანის) უნარ-ჩვევები და შეისწავლონ ჯგუფური მუშაობის სხვადასხვა ტექნიკა. განსაკუთრებული ყურადღება ეთმობა ჯგუფური მუშაობის დროს სხვადასხვა სახის სირთულეების დაძლევას, მათ შორის რთულ მონაწილეებთან ურთიერთობას.
|
|
საზოგადოებასთან და მედიასთან ურთიერთობა
ეს ტრენინგი განსაკუთრებით დააინტერესებს მათ, ვისთვისაც საზოგადოებასთან და მედიის წარმომადგენლებთან ურთიერთობა პროფესიული საქმიანობის ნაწილია. ტრენინგის მიზანია დაეხმაროს მონაწილეებს საზოგადოებასთან ურთიერთობის არსისა და დანიშნულების გაცნობიერებაში, გააცნოს მათ ე. წ. პიარ-სამსახურის ეფექტური სტრუქტურა და ძირითადი ფუნქციები. ტრენინგის მონაწილეები განიხილავენ მედიასთან ეფექტური ურთიერთობის როგორც საყოველთაოდ აღიარებულ, ასევე ჩვენი ქვეყნის თავისებურებებიდან გამომდინარე ჩამოყალიბებულ წესებს; გაეცნობიან “ახალი ამბის” და პრეს-რელიზის შექმნის ტექნიკას; გააანალიზებენ პრეს-კონფერენციის წარმატებისთვის საჭირო ყველა ელემენტს. მონაწილეები გაეცნობიან კრიზისის მართვის საკითხებს: როდის შეიძლება ჩაითვალოს სიტუაცია კრიზისულად, რა ამოცანები უნდა იყოს დასახული კრიზისული სიტუაციის სამართავად, რა ტიპის ღონისძიებების განხორციელება უწყობს ხელს კრიზისის მართვას და განიხილავენ კრიზისულ სიტუაციაში მედიასთან ურთიერთობის მნიშვნელოვან ასპექტებს. ტრენინგზე განხილული იქნება პიარ-კამპანიის სხვადასხვა ტიპები. მონაწილეები გაეცნობიან ეფექტური პიარ-კამპანიის ეტაპების თანმიმდევრობას, თითოეული ეტაპის მიზანს, ამოცანებს და შეფასების მეთოდებს; პიარ-კამპანიის ატრიბუტების (ლოგო, სლოგანი, შეტყობინება) ძირითად დანიშნულებას და მათი ეფექტურობის განმსაზღვრელ ფაქტორებს. ტრენინგი მოიცავს პრაქტიკულ სავარჯიშოებს, რომლებიც უზრუნველყოფს მიღებული თეორიული ცოდნის პრაქტიკაში გადატანას.
|
|
სტრესის მართვა
სტრესი ჩვენი დროის ერთ-ერთი ყველაზე სერიოზული და აქტუალური პრობლემაა. გადატვირთული სამუშაო გრაფიკი, არასასურველი გარემო პირობები, თავისუფალი დროის უქონლობა, მომავალზე ზრუნვა, პირადი პრობლემები და ა.შ. ერთ გრძელ ნეგატიურ ჯაჭვს ქმნიან, რომელიც მრავალი არასასურველი სიმპტომის სახით იჩენს თავს: თავის ტკივილი, კონცენტრაციის პრობლემები, გაღიზიანება, უძილობა, უიმედობის განცდა, შიში. სტრესის მართვის ტრენინგი დაეხმარება მონაწილეებს გაარკვიონ, თუ რა არის საერთოდ სტრესი, რა განსხვავებაა პოზიტიურსა და ნეგატიურ სტრესს შორის, გააანალიზონ სტრესის გამომწვევი ის შინაგანი თუ გარეგანი ფაქტორები, რომელთა კონტროლიც ადამიანს ან შეუძლია, ან არ შეუძლია. მონაწილეები შეისწავლიან ამ ფაქტორების გაცნობიერების გზებს და ასევე, სტრესის ხელის შემწყობი ნეგატიური აზრების დასამარცხებელ მეთოდებს. ტრენინგზე ყურადღება გამახვილდება ორგანიზაციული სტრესის მნიშვნელოვან ასპექტებზე. მონაწილეები მიიღებენ ცოდნას იმის შესახებ, თუ როგორ უნდა დაძლიონ, ან აიცილონ თავიდან გადატვირთული სამუშაო გრაფიკით გამოწვეული უარყოფითი შედეგები. კურსის დასრულების შემდეგ მონაწილეებს ეცოდინებათ არაერთი ფიზიკური თუ ფსიქოლოგიური ტექნიკა, როგორც სტრესის დასაძლევად, ასევე მისი თავიდან ასაცილებლად.
|
|
|
|