ყველა მენეჯერისათვის ნაცნობია შემდეგი სიტუაციები: თანამშრომელი მიმართავს მენეჯერს თავისი პრობლემით და სთხოვს დახმარებას; მენეჯერი უკმაყოფილოა თავისი თანამშრომლის შედეგებით და სურს მისი ქცევის შეცვლა; მენეჯერს სურს თანამშრომლის ინფორმირება ორგანიზაციის ამა თუ იმ მიზნის (მიზნების) შესახებ და მის მისაღწევად ოპტიმალური გზის შემუშავება; თანამშრომელი გამოთქვამს სურვილს თავისი განვითარების შესახებ, ან თავად მენეჯერი ხედავს მასში ჯერ გამოუყენებელ პოტენციალს და სტიმულს აძლევს განავითაროს ეს პოტენციალი; ახალი თანამშრომლის ინტეგრაციაა საჭირო გუდში; ორგანიზაციაში განხორციელებული ცვლილებების გამო თანამშრომელი საჭიროებს დახმარებას. აღნიშნული და სხვა მსგავსი სიტუაციები წარმოადგენს საფუძველს მენეჯერის მიერ ქოუჩინგის პროცესის განხორციელებისათვის. ეს არის გარკვეული ფაზებისგან შემდგარი პროცესი, რომელიც მენეჯერისგან მოითხოვს როგორც სხვადასხვა კომუნიკაციური ტექნიკის ფლობას, ასევე ქვეშევრდომების მიმართ დამოკიდებულებების კონკრეტულ სისტემას (მაგალითად, თანამშრომლის პატივისცემა, ნდობა მის მიმართ, დაინტერესება მისი შეხედულებებითა და მოსაზრებებით და სხვა). ქოუჩინგის პროცესის მიზანია თანამშრომლის განვითარება, ხელშეწყობა მისი პოტენციური შესაძლებლობების რეალიზებისათვის და საბოლოო ჯამში მისგან მეტი შედეგისა და ეფექტის მიღება. ტრენინგზე მონაწილეები დეტალურად შეისწავლიან როგორც ქოუჩინგის პროცესის თანმიმდევრობას და ფაზებს, ასევე მისი განხორციელებისათვის საჭირო ყველა კომპონენტს; მიიღებენ პრაქტიკულ რეკომენდაციებს ქოუჩინგის განხორციელების დროს აღმოცენებული სირთულეების გადასალახავად.